विर्ख वाइबा तामाङ
११ आश्विन २०८२, आईतवार
सिन्धुलीको घ्याङलेख गाउँपालिकामा आज सम्पन्न पालिका स्तरीय खुल्ला पुरुष भलिबल प्रतियोगिताको उपाधि आयोजक टुनिभन्ज्याङ युवा समाजका समूह `ए´ले जितेको छ।
प्रतियोगिताको उपविजेता पनि आयोजक समूहकै समूह `बि´ भएको छ। आयोजकले आफ्नो तीन समूह सहभागी जनाएका थिए। त्यस्तै सिम्ले युवा समाज तेस्रो र अमले टाइगर `ए´ सान्त्वना भएका छन्। प्रतियोगितामा १२ समूहले सहभागी जनाएका थिए।
प्रतियोगितामा प्रथम र दोस्रो हुने समूहलाई एउटा खसी, ट्रफी, मेडल र प्रमाणपत्र, तेस्रो हुने समूहलाई एउटा पाठी, ट्रफी, मेडल र प्रमाणपत्र त्यस्तै सान्त्वना हुने समूहलाई एउटा रातो भाले प्रदान गरिएको छ।
असोज १० गतेदेखि सुरु भएको प्रतियोगिता भोलि सम्पन्न हुने तालिका भएपनि आजै सम्पन्न भएको छ। उक्त प्रतियोगिता घ्याङलेख गाउँपालिका १ टुनिभन्ज्याङ्ग खेल मैदानमा सम्पन्न भएको हो। रेफ्रीको मुख्य भुमिकामा अर्जुन पाख्रीन रहेका थिए।
